Txhobkaw Vajtswv Tebchaws yog qhov fijxws ntawm kev ntseeg Vajtswv. Peb yuavtsum lees paub Vajtswv cov lus uas tau sau rau hauv Vajlugkub. Ceev kom tsimnuj tshajplaws los ua peb tug. Rauqhov Txojlus ntawd yog Yexus [Yeshua], Txojlus yeej nyob nrog Vajtswv thiab Txojlus ntawd yog Vajtswv. Vajtswv haistias, “Yog li Kuv Txojlus uas tawm ntawm Kuv lub qhovncauj mus – Nws yuav tsis rov los qhuav-nquas rau kuv; tabsis Nws yuav ua kom tau li Kuv pomzoo, thiab Nws yuav ua rau qhovchaw uas Kuv xa Nws mus ua kom tiav.” (Yaxayas 55:11 CJB)

Txojlus ntawd muaj fwjchim thiab yog txojsia. Txojsia ntawd yog Cawmseej Yexus. Thiab Txojlus ntawd yog Ntsujplig (Yauhas 4:24). Leejtxiv Vajtswv tau xa Nws Leejtub hauv tus Ntsujplig los xeeb rau hauv tus nkaujxwb uas yog Maslis (Lukas 1:26-35). Vajtswv Txojlus tau hais rau cov cevlus thiab lawv tau muab sau rau hauv Vajtswv phau Vajlugkub. Nimno, txhuayam twb tau tshwmsim thiab tiav rawsli Vajtswv hais lawm tiag.

Vajtswv muaj phau Vajlugkub uas yog Nws Txojlus

Vajtswv yog tus Tswv uas yog lub hauvpaus thiab yog lub ntsis, Nws yog tus pib thiab yog tus xaus. Nws yog Alafas thiab Aumenkas. Tsis muaj lwm tus ADONAI, Vajtswv, nyob ua ntej Nws. Nws yog tus rhawvtsim ib puas tsavyam huvtibsi, yog tsis muaj Nws. Ces txhuayam yeej tshwmsim tsis taus. (Tshwmsim 1:8, Yauhas 1:4-5)

Vajtswv Siv Leejtwg Sau Nws Txojlus?

Vajtswv siv Nws tus Ntsujplig Dawbhuv los tshoov cov cevlus sau li ntawm 40 leej, ntau tiamneeg, txawv neeg thiab txawv caij-nyoog sau li Nws tau qhia rau lawv.  Thawj-phau yog tau siv li ntawm 1,500 xyoo sau ua ntej Yexus yug thiab Phau-kawg siv li ntawm 100 xyoo, sau tomqab Yexus tuag thiab sawv rov los. Thaum pib txog rau thaum xaus yog siv li ntawm 1,600 xyoo.” [1]  Phau Qub muaj 39 phau,  Phau Tshiab muaj 27 phau, tagnrho yog 66 phau. Vajtswv Txojlus yog sau los cobqhia cov uas Vajtswv xaiv lawd, kom los ua lub neej rawsli Vajtswv tus dejsiab nyiam. Xwvkom haivneeg uas Vajtswv xaiv lawv lawm, thiaj tau txais tej koobhmoov uas Nws tau coglus tseg rau yawgkoob Aslaham (Chivkeeb 12:3) tias, “Kuv yuav foom koobhmoov rau cov uas foom koobhmoov rau koj, Tiamsis Kuv yuav foom phem rau cov uas foom phem rau koj. Kuv yuav foom koobhmoov los ntawm koj mus rau txhua tsav tibneeg hauv ntiajteb.”

Vajtswv yog txoj kevhlub, Nws hlub txhuatus tibneeg uas tau tshwmsim los ua neej rau lub ntiajteb. Xwvkom tus uas ntseeg Vajtswv Leejtub lawd, thiajli muaj kev sibraugzoo nrog Vajtswv. Yexus haistias, “Yog nej ua rawsli tej uas Kuv kom nej ua, nej thiaj yog Kuv cov phoojywg. Nimno Kuv tsis hu nej ua tubtxib lawm, rauqhov tus tubtxib yeej tsis paub xyov nws tus tswv ua abtsi. Tiamsis Kuv hu nej ua phoojywg, rauqhov Kuv twb qhia txhuayam uas Kuv hnov ntawm Kuv Txiv rau nej lawm. Tsis yog nej xaiv Kuv, tiamsis yog Kuv xaiv nej thiab tsa nej kom mus txitxiv ncw, txi cov txiv uas nyob mus ibtxhis. Yog nej tuav Kuv lub npe thov yam twg, Leejtxiv yuav pub yam ntawd rau nej. Tej uas Kuv kom nej ua yog li no: nej ibleeg yuavtsum hlub ibleeg.” (Yauhas 15:14-17 USB)

Peb zoo li cov neeg uas ua qhev, tsis nrog luag muaj vajhuam sibtxig sibluag, tsis tsimnqi abtsi, tsis nrog muaj liaj – ia tebchaws, tsis nrog luag muaj nom muaj tswv. Ua neeg tsiv teb tsaws chaw mus nyob qiv luag toj yug yaj, nqis luag tais rau ntxhai.  Haivneeg no ntxub dhau mus rau haivneeg tod, haivneeg tod ho ntxub thiab raws khiav mus rau lwm haivneeg. Thaum peb tseem ua neej nyob hauv dab lub xibteg los kuj tibyam nkaus li ntawd thiab, tiamsis hnub uas Vajtswv hu peb thiab xaiv peb los ua Vajtswv haivneeg lawm. Cawmseej Yexus thiaj muab peb rub los nrog nws ua phoojywg.  Nws nrhiav txoj haukev cawm peb ua ntu zus los txog rau hnub no. Tus uas tsis paub ua Vajtswv tsaug, kuj nyob ntawd nws tuskheej. Tabsis hnubno yog koj paub qhovtseeb lawm. Tsimnyog koj yuavtsum zoo siab ua tsaug rau Vajtswv phau ntawv Vajlugkub, uas yog Vajtswv Txojlus. Xyaum ua lub neej li Vajtswv tus dejsiab, xwvkom koj thiaj tau koobhmoov hauv Yexus Khetos lub Npe.

 

 

 

KOJ YOG LEEJTWG HAUV YEXUS

“Vim Vajtswv txoj kevhlub. Vajtswv thiaj tau txiavtxim siab haistias Nws yuav saws peb los ua Nws cov menyuam los ntawm Cawmseej Yexus, rawsli Vajtswv lub siab nyiam thiab Nws lub homphiaj.”  (Efexaus 1:5 HNV)

Puas tsimnyog koj paub tias koj yog leejtwg hauv Yexus?

            Ncua sijhawm thaum koj tseem tsis tau paub tias koj yog leejtwg hauv Yexus. Ces koj hajtseem tsis tau paub qhovtseeb txog Yexus. Ntu kevuaneej uas koj tsis tau paub qhovtseeb txog Nws, tus uas yog tus Tswv Cawmseej, ces koj yeej tsis tau suav tias kev uaneej nyob hauv Yexus tseemceeb npaum licas. Tabsis mus txog ntua rau thaum uas koj txuas tau txojsia rau Yexus tus Ntsujplig lawm. Koj yeej yuav paub thiab pom qhov txawv ntawm lub neej ntseeg Yexus. Lub neej ntseeg ADONAI, Vajtswv, tseemceeb thiab muaj nqis heev rau tus uas yuav mus rau Vajtswv lub Tebchaws. Thaum tseem ua neej nyob rau lub ntiajteb thiab lub neej yav tomntej uas yuav mus nyob lub Tebchaws Tshiab, lub Ntiajteb Tshiab thia lub Nroog Tshiab yav pemsuab. Peb yuav tau ua lub neej hauv Vajtswv tsevneeg, uas yog pawg-ntseeg kom phim yog Nws cov menyuam thiab yog Nws Haivneeg Qaumntuj. (Tshwmsim 21:1-3).

            Vajtswv lub homphiaj uas saws peb los ua Vajtswv cov menyuam, kom peb thiaj paub ua lub neej li Vajtswv lub siab nyiam. Thaum uas koj paub tias koj yog leejtwg hauv Yexus lawm. Koj thiaj rasxeev thiab paub tias koj yuav ua abtsi, thaum twg koj li ua, thaum twg koj li mus, thiab yuav ua licas txog tes haujlwm uas Yexus xav kom koj ua. Xwv tej uas koj ua thiaj tau qabhau rau koj tuskheej thiab thiaj tsis nkim koj lub zog qhuav qhawv povtseg. Vim koj paub tseeb tias kevuaneej hauv Yexus tseemceeb npaum licas rau koj. Ces koj thiajli kub siab lug ua neej tiagx. Thaum ntawd, koj yuav txaus siab qhauhlo koj tuskheej los ua neej nrog cov ntseeg Yexus uas yuav mus nyob saum Vajtswv lub Tebchaws.

Txhua nqe Vajlubkub hauvqab no yog hais txog tias koj yog leejtwg hauv Yexus

• Kuv muaj txoj kevciasiab hauv Yexus. (1 Yauhas 3:3)
• Vajtswv saws peb los ua Nws cov menyuam rawsli Nws lub homphiaj. (Efexaus 1:5)
• Kuv yog Vajtswv ib tug menyuam. (Yauhas 1:12)
• Kuv yog Yexus tus phoojywg. (Yauhas 15:14)
• Kuv yog ib tug uas koom nrog Yexus li teejtug ntawm Vajtswv. (Loos 8:17)
• Kuv tau koom nrog tus Tswv hauv tibtug Ntsujplig. (1 Kaulithaus 6:17)
• Kuv lub cev yog lub tuamtsev rau Ntsujplig Dawbhuv, Nws nyob hauv kuv. (1 Kaulithaus 6:19)
• Kuv yog ib feem hauv Cawmseej Yexus lub Cev. (1 Kaulithaus 12:27)
• Vajtswv yog kuv Leejtxiv. (Ephesians 1:2)
• Kuv twb raug txhiv thiab raug zamtxim lawm. (Kaulauxais 1:14)
• Kuv muaj lub neej puvnpo koomxeeb nrog Yexus Cawmseej lawm. (Kaulauxais 2:10)
• Kuv nyob hauv Yexus Cawmseej thiab taugkev hauv tus Ntsujplig Dawbhuv. (Loos 8:1)
• Kuv nyob hauv Yexus Cawmseej thiab kuv yog tus neeg tshiab lawm. (2 Kaulithaus 5:17)
• Kuv yog tus uas raug Vajtswv xaiv, dawbhuv thiab ntximhlub. (Kaulauxais 3:12)
• Kuv yog tus uas Vajtswv tsa tshwj rau ib cag, Nws ywg roj rau kuv, kuv nyob ruaj khov rau hauv Yexus Cawmseej. (2 Kaulithaus 1:21)
• Kuv yog ib tug tubqhe ua haujlwm nrog Yexus Cawmseej. (2 Kaulithaus 6:1)
• Kuv raug tsa sawv thiab zaum uake nrog Cawmseej Yexus. (Efexaus 2:6)
• Cov Yudais thiab lwm Haivneeg, peb suavdaws koom tibtug Ntsujplig thiaj mus cuag tau Vajtswv. (Efexaus 2:18)
• Kuv tau raug Cawmseej Yexus xaiv thiab tsa kuv mus txi cov txiv nyob mus ibtxhis, thiab yog kuv thov yamtwg ntawm Leejtxiv hauv Yexus lub Npe, ces Leejtxiv yuav ua yam ntawm rau kuv. (Yauhas 15:16)
• Kuv yog ib lub pobzeb uas Vajtswv muab tsa ua ib tug ncej txheem Vajtswv lub tsev hauv sab plig lawm. (1 Petus 2:5)
• Kuv yog ib tug uas tau ua haujlwm sawvcev rau Yexus. (2 Kaulithaus 5:20)
• Kuv twb yog ib tug uas Vajtswv coglus haistias kuv muaj feem koom rau Vajtswv cov neeg qaum ntuj lawm. (2 Petus 1:4)
• Kuv tsis yog tus uas Cawmseej Yexus tsotseg. (Henplus 13:5)
• Vajtswv ua haujlwm nyob hauv kuv pab kuv ua tej uas Nws xav kom kuv ua. (Filipis 2:13)
• Kuv muaj peevxwm taij tswvyim ntawm Vajtswv thiab Nws yuav pub rau kuv li tej uas kuv xav tau. (Yakaunpaus 1:5)

Yogtias, Koj yuav mus Vajtswv lub Tebchaws, koj yuavtsum xaiv thiab ntseeg tej uas Vajtswv hais txog koj: Koj yuav tsum niajhnub ua lub neej li cov Vajlugkub uas sau rau saum toj no. Ib hnub twg koj siv li 10 mus rau 20 nastis, los nyeem kom nrovx. Yog koj nyeem thiab paub ntau npaum licas txog qhov uas hais txog koj yog leejtwg hauv Yexus lawm. Koj tus cwjpwm yuav pib hloov zujzus li Yexus Cawmseej [Khetos]. Ces koj yuav rasxeev li tus neeg uas feebmeej tsim-nto plaws rau hauv sab ntsujplig uas txuas tau nrog Yexus Cawmseej. Tsis tau txhais tias koj yog Yexus, tabsis muaj tus cwjpwm li Yexus. Xwvkom koj thiajli rau siab ntso uaneej nrog Yexus Khetos rau lub neej niajhnub nimno thiab lub neej mus ibtxhis yam pemsuab.

Paulus haistias, “Tsis txhob ua nej lub neej rawsli lub ntiajteb no tus qauv, tiamsis cia Vajtswv muab nej hloov dua tshiab uas yog hloov nej txojkev xav, kom nej muaj peevxwm paub tau Vajtswv tus dejsiab haistias abtsi zoo, abtsi haum Nws siab, thiab abtsi yog qhov uas zoo tshajplaws.” (Loos 12:2 UBS)

Paulus haistias, "Thaum koj muaj peevxwm yoog thiab ua tau neej raws li Vajtswv tus dejsiab. Ces koj lub neej yuav tau txais tej koobhmoov li Vajtswv Txojlus hais no tias, “Peb ciali ua Vajtswv uas yog peb tus Cawmseej Yexus Leejtxiv tsaug! Vim qhov uas peb tau los nrog Cawmseej koom uake lawm. Vajtswv thiaj foom txhuayam koobhmoov sab ntsujplig uas los saum Qaumntuj los rau peb. Thaum tsis tau tsim ntuj tsim teb, Vajtswv twb xub xaiv peb los ua Nws tug los ntawm peb txojkev koomxeeb nrog Cawmseej los ua Vajtswv haivneeg lawm, kom peb thiajli dawbhuv thiab tsis muaj ib qhov raug kiam tabmeeg Vajtswv li.” (Efexaus 1:4 NKJV)

 

Suav txij li hnub no mus rau lub neej yam tomntej, koj cia li zoo siab thiab ua tsaug rau tus Tswv uas yog peb Leejtxiv Vajtswv Qaumntuj. Rauqhov txhuayam koobhmoov yog Nws tau pub rau koj.